لومړنۍ مرستي

لومړنۍ مرستې هغه فوري او لنډمهاله پاملرنه ده چې د ناروغ یا ټپي کس سره د مسلکي طبي مرستې تر رسېدو مخکې ترسره کېږي. د لومړنیو مرستو موخه د ژوند ژغورل، د ناروغ حالت له خرابېدو څخه مخنیوی او د رغېدو چټکتیا ده. لومړنۍ مرستې د پېښو، سوځېدنو، وینې بهېدنې، ماتېدنو، بې‌هوښۍ، برېښنا لګېدنې او نورو بیړنیو حالتونو کې ورکول کېږي. د مرستې ورکوونکی باید لومړی د پېښې ځای خوندي کړي، د ناروغ حالت وارزوي او د اړتیا په صورت کې بیړنۍ طبي مرستې وغواړي. د وینې د بهېدو په صورت کې باید پر زخم مستقیم فشار واچول شي. د سوځېدنې په حالت کې سوځېدلې برخه په یخو اوبو یخه شي. د هډوکو د ماتېدو په صورت کې باید اغېزمن غړی بې‌حرکته وساتل شي. که ناروغ تنفس نه کوي، د اړتیا په صورت کې د زړه او سږو بیاژوندي کولو (CPR) کړنې ترسره کېږي. د لومړنیو مرستو زده کړه د هر انسان لپاره مهمه ده، ځکه په بیړنیو حالاتو کې د یو کس پر وخت مرسته د بل انسان ژوند ژغورلی شي.