د بدن دفاعي میکانیزم

د بدن دفاعي میکانیزم هغه طبیعي سیستم دی چې د انسان بدن د ناروغیو، میکروبونو او زیانمنو موادو پر وړاندې ساتي. دا سیستم بدن ته داخل شوي جراثیم له منځه وړي او د ناروغیو مخه نیسي. د بدن دفاعي سیستم ته معافیتي سیستم هم ویل کېږي. د بدن لومړنۍ دفاع پوستکی او مخاطي غشاګانې دي، ځکه دا د میکروبونو د داخلېدو مخه نیسي. اوښکې، لاړې او د معدې تیزاب هم میکروبونه له منځه وړي. که جراثیم بدن ته داخل شي، سپینې وینې حجرې فعالېږي او له هغوی سره جګړه کوي. دفاعي سیستم دوه ډوله دی: طبیعي دفاع: هغه چې انسان له پیدایښته لري. اکتسابي دفاع: هغه چې د واکسین یا ناروغۍ وروسته پیدا کېږي. کله چې بدن له یوه میکروب سره مخ شي، حافظوي حجرې جوړوي ترڅو په راتلونکې کې هماغه ناروغي ژر وپېژني او مقابله ورسره وکړي. مناسب خواړه، ورزش، خوب او حفظ الصحه د دفاعي سیستم د پیاوړتیا لپاره مهم دي.